Curator Felix de Rooy di e eksposishon Isla den Nos Bida e pidi Giovanni
Abath traha un obra di arte monumental speshal pa kompletá e bunita piesanan di Abath ku ya ta forma parti di e eksposishon. Djamars atardi 17 yanüari a desvelá e obra aki.
Giovani Abath ta un artista outo didáktiko ku tin 15 aña trahando arte plástiko i tin 26 aña trahando na Refineria Isla. Su lema ta ‘Semper positivo.’
E ta traha ku heru pero e ta usa tur material pa traha, dependiendo su inspirashon.
Pa selebrashon di 30 aña Refineria Isla na Kòrsou, el a traha un serie di eskultura ku awor ta parti di e eksposishon Isla den Nos Bida. Felix de Rooy a keda asina inspirá ku e obranan aki ku el a pidi Abath traha un obra speshal pa e eksposishon.
Den su spich prome ku desvela e obra, Abath a bisa kon orguyoso el a sinti ku un artista manera felix de Rooy, ku e ta atmira, a pidi e traha un obra. Tabata un honor pa e traha un obra speshal pa Isla de Nos Bida.
Diferente konosedó di arte lokal i direktor di Refineria Isla tabata presente pa tira un promé bista riba Man of Steel. Tur presente a keda impreshoná. Richenel Ansano, direktor di NAAM a ekspresá su gratitut splikando ku pa NAAM, ta di sumo importansha ku hende di tur gremio den sosiedat kontribuí na un eksposishon asina aki. Komo trahadó di den Isla, Giovanni Abath ta e artista ku meresé traha un obra asina grandi pa e eksposishon. Su arte ta duna kara pa trahadónan di Isla ku hopi biaha a traha sin masha rekonosementu.
For di djarason 18 yanauri tur hende ku bista Isla den Nos Bida, ku ta konta historia di 10aña refineria na Kòrsou, por gosa tambe di Man of Steel. Man of Steel ta para orguyosamente riba patio di NAAM na Pietermaai.
Por bishita e eksposishon djamars pa djabièrnè 8.00 – 5.00, i den wikènt di 10.00 – 4.00.