Tanki di rekompreshon

Seri di Herensia Kultural

“E tanki di rekompreshon tabata un regalo di Shell na dòkter Kroon” asina  bruder Edwin Lorenzo Valeriano di Sehos, ku durante desenas di aña a traha ku e aparato, ta konta.  “Na prinsipio su lugá tabata kantu di awa na Batipaña. Tabata e promé tanki di rekompreshon ku Kòrsou tabata disponé di dje. Promé ku esei sambuyadónan ku síntoma di e enfermedat di dekompreshon mester a bolbe baha den awa.”
E enfermedat di Bends ta un konsekuensia di a keda demasiado tempu bou di awa. Debí na e preshon ku ta oumentá durante ku un hende ta sambuyá, tehido di su kurpa ta apsorb’é e nitrógeno den e aire ku e ta inhalá. Tantu mas hundu i mas largu bo sambuyá, tantu mas nitrógeno ta akumulá den bo kurpa. Segun bo ta subi pa sali na superfisie atrobe e preshon ta bai bahando i poko poko bo ta ekshalá e nitrógeno. Si bo subi demasiado lihé òf si bo keda demasiado largu bou di awa e nitrógeno di mas no por sali for di bo kurpa. Esaki ta forma globonan di aire den bo sanger, loke ta aktivá tur sorto di komplikashon, entre otro bo ta sinti bo kabes ta bira, bo ta bira steif, bo kurpa ta hinka, bo ta sintibo slap, drenta shock, sintibo lam, sinti difikultat pa hala rosea i doló den brasa, pia i skarnirnan. Den kasonan masha serio e enfermedat por  ponebo pèrdè konosementu i e por tin hasta morto komo konsekuensia. E síntomanan ta surgi generalmente entre un kuartu di ora te 12 ora despues di a sambuyá. Den un tanki di rekompreshon ta pone e sambuyadó bèk na sierto preshon, di manera ku e ora ei e por ekshalá e nitrógeno di mas ku e tin den su kurpa.  E preshon preskribí ta dependé di kon hundu el a sambuyá. “E promé pashènt ku nos a trata den e tanki di rekompreshon di Shell, tabata un mucha hòmber chikitu di for di tera ku tabatin un infekshon di tétano,” segun Valeriano.  E atmósfera den e tanki ta konsistí di aire normal. Sin embargo, komo e pashèntnan ta haña oksígeno puru via un máskara, esaki ta mata kualke infekshon.  Resientemente desaroyonan muchu mas moderno ta pèrkurá pa e aire ku e persona ekshalá pasa via un slan bai, di manera ku esei no ta drenta den e kamber di aire atrobe. Despues di a para algun aña kantu di awa, a muda e tanki di rekompreshon pa Sint Elisabeth Hospitaal mes, loke por lo general tabata mas práktiko pa tratamentu di e pashèntnan.
E tanki di Shell, den kua por a subi e preshon te na dos atmósfera, a keda den funshon te na 1976; despues di esei ta tanki di rekompreshon di Marina Real so tabata na servisio; esaki ta ofresé muchu mas posibilidat. Valeriano “Den e tanki bieu ta un pashènt so por a trata na e mes tempu”. E kamber den e tanki ta 2.30 pa 1.90 meter. Un persona di 1.80 meter no por a bai aden. E slùis, destiná pa kambia e kondukshon, ta 1.15 pa 1.90 meter. Den e tanki di marina por bai tres pashènt. Tin ademas den tur dos tanki lugá pa un hende ku ta kompañá i guia. Pasobra e tanki di Shell tabatin un sistema di spula mas simpel, e tabata keinta mas lihé i p’esei mester a spul’é ku mas frekuensia ku e tanki di marina.” Tur hende ku tarea di guia na Sehos por bai huntu ku e pashènt te un preshon ku ta reina na un profundidat di 165 pia, segun e bruder. “Pero generalmente ku 60 pia bo ta yega basta leu ku e tratamentu. Den kurso di añanan e manera di trata a kambia. Antes pashèntnan tabata keda hopi biaha sinku ora den un tanki di preshon, i si nan keha solamente di doló den e skarnirnan tabata pone nan dos ora i un kuartu. Ta dies aña kaba ku despues di kada 20 minüt ku duna oksígeno ta tene un periodo di sinku minüt di sosiegu, di manera ku e pashènt por kome òf bebe algu. Na Estados Unidos nan a proba ku si un pashènt keda 90 minüt den e tanki na un preshon manera ta reina na un profundiat di 60 pia e sosiegu ei ta duna mihó resultado.”
No ta habitantenan lokal so, tambe pashèntnan di e islanan bisiña  i di den region konosé kaminda pa e tanki di rekompreshon na Kòrsou. “Nos ta haña pashènt di Puerto Rico i di Estados Unidos,” segun Valeriano. “Tur e basenan di forsa aéreo sa ku nos ta disponé di ekipo ku ta kumpli ku normanan internashonal.”

Fuente

Entrevista ku Edwin Lorenzo Valeriano, febrüari 2001.PADI Open Water Diver Manual, Hettlingen, Duitsland, PADI-Europe, 1988.