Maskarada: herensha di Karibe i Bonaire

Tin similitutnan entre Maskarada, Guloya i ‘Diablitos’ i e paradanan di diferente kultura di Afrika sup-Sahara. Kasi tur kultura sup-Sahara konosé paradanan di maskarada pa sea gradisí Ser Supremo i Spiritunan di naturalesa pa un bon kosecha, protekshon kontra malesa, morto òf desaster i tambe komo forma kolektivo pa venerá antepasadonan. Entre esnan mas importante nos por menshoná e parada “Egungun” di e kultura Yorubá (unda awe Nigeria ta situá), e parada “Gelede” di e kultura Fon/Dahomey (unda awe e paisnan Benin i Togo ta situá) i e parada di e tribu Bantú  “Bapende” (e parti oriental di Repúblika Demokrátiko di Kongo). E paradanan aki tin hopi similitut den nan ritualnan. Por ehèmpel elaborashon di e maskaradanan i e trahe òf disfras di esnan ku ta partisipá den e parada.

Kofradia

Tantu e maskarada mes komo e disfras ta simbolisá e frontera entre e mundu invisibel – kaminda Ser Supremo, espíritunan di naturalesa i antepasadonan ta biba i e mundu visibel, habitá pa hende, flora i founa. Ta elaborá tantu e maskarada komo e disfras di tal forma ku e ta kubri henter kurpa di esun ku ta partisipá den e parada. Pues su identidat ta  keda deskonosí. Esaki pasobra ta sali for di e kreensha ku unabes e persona bisti e maskarada òf disfras, sea un spiritu di naturalesa òf spiritu di un antepasado ta posishoná di su persona i komo tal e persona aki ta sede su personalidat na esun di e spiritu ku a posishon’é. Otro elemento igual den e paradanan afrikano aki te aspekto organisatorio. Organisashon i ehekushon di e paradanan aki ta den man di sosiedatnan forma eksklusivamente pa hende hòmber. Den hopi kaso ta trata di sosiedat o kofradia religioso ku ta usa tipo di aktividatnan asina komo transishon ritual di un mucha hòmber pa madures adulto. Tirando un bista riba e paradanan den nos region, nos por nota e similitut  den elaborashon di e maskaradanan, e aspekto di eksklusividat maskulino, e aspekto sekreto di e partisipante i aspektonan organisatorio. Asina tin e similitut estétiko entre e maskaradanan ku ta usa den ‘el baile de los diablitos’ na Chuao i maskaradanan elaborá pa e tribu Bantú ‘Bapende’.

Organisashon di ‘Guloya’ na Repúblika Dominikana ta den man di kofradianan di hende hòmber ku tambe ta usa e parada aki komo inisiashon spiritual di su miembronan.

Boneiru

Kedando serka di kas nos por nota ku, defuntu Max Sintiago, den un artíkulo dediká na Maskarada na Boneiru ta hasi menshon di e echo ku “no tabata permití mucha pa partisipá den un grupo di maskarada. Muhé tampoko. Maskarada tabata kos di hende hòmber, ounke sa sosodé un aña ku un hòmber ta disfrasá na muhé”. Referiendo na e aspekto di identidat sekreto di e partisipante na e parada di Maskarada defuntu Max Sintiago ta bisa den mesun artíkulo “ora ku miembronan di e grupo drenta e kas pa kita e maska tabata sera tur porta i bentana pa asina evitá ku esnan disfrasá tabata ser rekonosé. (…..) E motibu pakiko e personanan mester a keda deskonosí tabata ku durante di e marcha e maskarada nan tabata hasi tur sorto di kos prèt. Por ehèmpel nan tabata spanta mucha òf mishi ku kualke dams para kant’i kaminda”. Otro similitut entre paradanan di Maskarada den nos region ta e temporada den kua ta tene esakinan. Tur ta koinsidí ku fiestanan katóliko di fin òf kuminsamentu di aña. Na Boneiru ta tene parada di Maskarada riba òf rondó di fiesta di Tres Rei. Na Repúblika Dominikana i na Venezuela riba dia di ‘Corpus Christi’, fiesta di Santísimo Sakramentu di Altar. E koinsidensia aki tin di haber ku e echo ku durante sklabitut, doño di plantashon tabata duna nan katibunan liber den e temporada aki i tabata pèrmitnan tene sierto aktividatnan, basta ku esaki keda den márgennan aseptabel pa e doñonan di plantashon i pa Iglesia. E paradanan di maskarada na nos pais i den nos region por ta diferensha den funshon i propósito religioso ku esnan di Afrika. Pero ku nan rais ta fuertemente ankra den tera di Mama Afrika ta algu ku niun hende por ninga.

Foto 1: Maskarada Bonaire.
Foto 2: Un maskarada di e tribu ‘Bapende’.

Fuentenan

Folklore Boneriano,  Max St. Jago, 1995 (1980), hoofdstuk Maskarada vertaalde versie van artikel van Frans Booi.
La Negritud en Venezuela, Angelina Pollack-Eltz, 1989
Cuadernos Lagoven, serie Medio Milenio  Masks Rock Africa’s Cradle òf Voodoo, Chris Rainier National Geographic News 2004
Los bailes Cocolos, Higuey Magazine, Republica Dominicana 1982
Beads Body and Soul, Art andLlight in the Yoruba Universe, Henry John Drewal, John

Danki speshal ta bai na Boy Antoin, gran investigadó di kultura di Boneiru i di Antia.

Teksto: Bob Harms  Foto: via Hubert Vis/Bonaire,  Angelina  Pollack-Elz,  Cuadernos Lagoven