Karnaval i t trahe di Karnaval

Seri di Herensia Kultural

Carnaval, Curacao, Grand March 2008Mashá poko ta konosí tokante orígen di Karnaval na Kòrsou. Probablemente miembronan di elite europeo a trese karnaval Kòrsou na fin di siglo 19. Publicatieblad no.30 di 1872 ta menshon’é pa promé biaha ofisialmente.
Te na aña 1953 tabata selebrá Karnaval prinsipalmente den klupnan sosial. Na añanan sesenta bou di direkshon di Elias Bronswinkel a rebibá karnaval atrobe. I for di 1970 Karnaval di Kòrsou ta sigui krese komo un fiesta popular ku ta selebrá tur aña. Ta start ku Festival di Tumba, ta skohe despues un reina, un prens i un pancho, ta kulminá ku e Gran Marcha.
NAAM pa medio di e rúbrika akí ke duna un kontribushon den Luna di Karnaval Korsou  2009 na konosementu di desaroyo di Karnaval i su trahe.

Mas di 600 yarda di tela, 144 bòter di leim i prinsipalmente un bon dósis  di perseveransia ta e reseta. Lila van der Meulen, tempu ei diseñadó di e trahenan pa e grupo di karnaval Gipsies, ta kompará e trabou di diseño i kostura di e trahenan di karnaval ku trahamentu di bolo. “Bo mester di tur e ingredientenan pa bo por traha algu bunita di bèrdè.” E trahenan di e sesentisinku miembronan di Gipsies ta tuma mas di 32.000 pida tela. Nan ta bai bistí komo kaleidoskopio den Gran Marcha. Nochi tras nochi nan ta traha te lat den nan klup. Aki bo ta haña hende ta plak, kòrta i bòrda. “Loke hende ta gusta ta brio, gleter i kolónan yamativo”, esei ta Lila su eksperensia di trinta aña. For di yüni di aña pasá e klup a aprobá su diseño. “Esei ta nesesario pa por logra tin tur kos kla na tempu.” E biaha akí e miembronan tin hopi kos di hasi. Kosedónan profeshonal ta entregá e trahe básiko, pero ta masha trabou tin di hasi pa dòrna e trahe, sombré i hanskunnan. Ta asina ta sosodé tur aña atrobe den tur e gruponan. Esta for di añanan setenta di e periodo aktual di karnaval, tambe yama ‘era nobo’. Ántes tabata otro. Promé ku 1953 tabata selebrá karnaval prinsipalmente den klupnan sosial na nos isla. Orlando Cuales ta kòrda ku hendenan den òptògt di ántes tabata bisti maskarada. “Trahenan presioso”, ‘Shon Bènchi’ Wefer ta agregá. “Miembronan di e diferente klupnan tabata disfrasá masha shik na makaku, pirata, na tur sorto di kos.”  E desaster di e inundashon di 1953 na Hulanda a nifiká final di nos ‘karnaval estilo bieu’.

Ta te na prinsipio di añanan setenta a bolbe organisá un òptògt. Orlando: “Nos miembronan a puntra asombrá ora nos a bai partisipá pa promé biaha ku grupo Globo: ‘Nos no ta haña maskarada? Ami no ta bai kana asina ei si tur hende ta rekonosémi.’ Pues nos a duna tur hende un antifas. Pero na mitar di kaminda tur hende a kit’é tir’afó.”
Karnaval a krese bira e fiesta popular mas grandi di Kòrsou. Ta e teater di kaya ‘theater of the streets’, asina Orlando a yam’é. “Ku Grupo Globo nos ke trese un mensahe, representá algu, proklamá algu. No ta e kanamentu nèchi den kompas ta konta, sino e alegria eksesivo, selebramentu di  e fiesta.” Tras di kada ‘representashon’ di Globo tin un pensamentu, un filosofia. Ántes e miembronan tabata disfrasá na pirata òf payaso. Pero e tempu ei a pasa. Orlando: “Nos no ta kere mas den eseinan. Awor nos ta trese un tema. Algun aña pasá por ehèmpel: féniks, saliendo di e idea ku bo por renasé, ku mañan lo ta un mihó dia. Kompleto nos a tres’é, ku un poema kargá pa muzik i ku a toka durante e òptògt.  Anto na aña 2002 e tema ta tokante e papel importante ku hende muhé ta hunga den komunidat: ‘Muhé ta manda mundu’ un dicho konosí na Kòrsou.”  Globo ta rebibá e hit bieu di Doble R ‘Muhé ta manda mundu’.

Ritmo i muzik ta indispensabel den marcha di karnaval. Durante añanan kuarenta emigrantenan di Islariba den servisio di e refineria di aki tabata djùmp riba muzik di steelband den kayanan di Suffisant. Despues sobrá di komunidat tambe a djòin e fiesta di karnaval i bandanan lokal manera Orquesta Concordia, Melody Boys i Piscadera Bay Orchestra tabata kompañá e marchanan. Pero for di añanan setenta, añanan di identidat propio i konsenshi nashonal, gruponan ta kana e ruta di Gran Marcha, disfrasá den trahenan kolorido, radiante i riba ritmo di nos propio muzik, nos Tumba.

Tur kos por, tur hende ta loko loko den karnaval. Diseñadónan, trahadónan di karosa, kosedó i músikonan ta perkurá pa tur aña di nobo tin kreashonnan sobresaliente. Rònt mundu pueblonan ta selebrá fiesta i ta disfrasá e djadumingu promé ku djárason di shinishi, promé dia di e periodo di yuna. “Sin embargo, na kada lugá e fiesta ta nèt un tiki distinto.” Ta opinion di Orlando. “Nos ta dediká, por ehèmpel masha atenshon na loke nos ta bisti. Na otro paisnan bo ta mira ku ta djis algun hende ta kana bistí ku un kreashon refiná i sobrá ta bisti algu di mes koló, nada partikular. Na Kòrsou kada trahe mester ta sumamente spesial. Nos ta dediká muchu mas ora na obra di man ku na mayoria di pais.”
Tempu ta kambia. Tur kos ta mas karu. Kosedó, banda… Si binti aña pasá un miembro tabata paga mas o ménos 300 florin pa su trahe, awor e mester skupi 800 te 900 florin pa e por kana den Gran Marcha. Pero asina tantu sunú manera na Trinidad i na Brazil karnavalistanan kurasoleño no ta ekshibí. E motibu ta meresé un estudio.

Portrèt:
1. Trahe di karnaval
2. Desaroyo di trahe

Fuentenan

Juan Camelia (adaptashon  I. Witteveen), ‘Hoe carnaval groeide tot een echt Curaçaos volksfeest’ den  Amigoe, 22 di yanüari 1994.

Kombersashon ku: Fifi Rademaker, Carl van der Meulen, Lila van der Meulen, Orlando Cuales i Benjamin ‘Shon Bènchi’ Wefer (2002)

Teksto Eva Breukink, NAAM. Portrèt: Prince Victor.