Graf- i sementerionan

Seri di Herensia Kultural

Pero e lei akí tabata aplikabel solamente den stadsdistrict. Pafó di stadsdistrict sí tabata permití dera hende riba tereno propio. Ta p’esei nos ta topa aki i aya sparsí rònt Kòrsou grafnan, ku awendia generalmente ta tur kubrí na mata ku yerba i na mal estado.
Entre e grafnan akí loke prinsipalmente ta yama atenshon ta e graf na forma di silinder, ku debí na alto kosto di konstrukshon nan tabata usa pa personanan prominente i importante di nos komunidat. Pakiko a usa graf na forma di silinder no ta mashá kla ainda. Den e artíkulo akí nos ke deskribí algun di e grafnan ku ta eksistí pafó di e sementerionan na uso. E echo ku despues di tantu aña ainda tin tantu di e grafnan akí, ta nifiká ku mashá tempu pasá a traha e grafnan akí pa hopi plaka i ku hopi difikultat, ke men ku probablemente nan no tabata graf di hende humilde.

Graf na San Juan

Na kantu di kaminda ku ta bai Lanthùis San Juan hende por mira entre e matanan un konstrukshon na forma rektangular abou: un graf. Riba e graf no por mira nada skibí. Matthias Schotborgh (1832-1913), un di e doñonan di San Juan, ta derá aki. Den e lanthùis tin un portrèt di e Mattias akí: un hòmber un poko severo ku barba. Un miembro di fama, ku ademas ta un di e doñonan di e plantashi, Reginald Schotborgh, sa di algun anékdota di Matthias i e ta konta nos.
Matthias a biba henter su bida na e plantashi San Juan i e tabata atministrador aya. Komo yònkuman el a namorá un di e mucha muhénan katibu na e plantashi. E tabata yam’é Fanny, e otro hendenan na e plantashi tabata yam’é Pechi. Un dia Matthias su tata a yam’é bin kome pero e no a aparesé. Meskos a pasa e siguiente dianan. Ora su tata a yama su atenshon riba e echo akí i el a puntra pakiko e no ta sinta na mesa ku su famia Matthias a bis’é: “Papa, si bo ke bende Fanny, bend’é e ora ei huntu ku mi.” Su tata a kontest’é ku e no tabatin ningun intenshon di bende Fanny, pero e ker a sa ku siguransa sí kiko tabata Matthias su sintimentunan pa Fanny. P’esei el a pone riba un mesa un lista ku nòmber di e katibunan ku e tabata bai bende. El a hasi esaki asina visiblemente ku Matthias no por a keda sin mira e lista. Matthias a stima Fanny, sin embargo di e relashon akí no a nase niun yu. Despues di emansipashon Fanny a haña e fam Bicitini i despues di morto di Matthias el a keda biba na e plantashi.

Graf na San Hieronimo

Djis tras di e tranké di Parke San Kristòf, na e plantashi San Hieronimo, pegá ku e mina di koper bieu tin graf di un hòmber ingles, un monumento chikitu rektangular, trahá di piedra natural i klenku. Na parti pariba tin riba e graf akí skibí:
Sacred To the memory of William Foot of Horrabridge
Devon England Born may 26th 1846
Na e parti nòrt: H.W. Toop
Na e parti sùit Erected by J.G. 1880
Na e parti pabou: Died on this estate July 25th 1879
Aged 33 years
His end was peace.

Na Archivo Nashonal nos ta topa ku akta di fayesimentu di William Foot riba kua tin menshoná ku William Foot tabata obrero minero.
Na e parti akí di Kòrsou alrededor di aña 1875 tabata koba koper i manganeso. E gran hòmber di fòsfat na Klein Curacao i Seru Mesa, John Godden, tambe tabata envolví den eksplotashon di e mina. Probablemente William Foot tabata un di e obreronan minero ku a traha na e parti akí di Kòrsou. Ke men ku J.G. ta indikativo pa John Godden. Ta asina ku John Godden a nase na 1850 na Calstock, Cornwal ku ta keda pegá ku Horrabridge. Na e parti akí di Inglatera durante hopi siglo nan a koba mineral di koper. Segun genealogia di famia Foot, William a nase den e pueblesito Buckland Monachorum ku ta pertenesé na Horrabridge i un fam bieu di e lugá akí ta ‘Toop’. Kiko e relashon eksakto entre Godden, Toop i Foot tabata, lo mester sigui buska mas aleu den archivonan.

Graf na Ascencion, Dokterstuin i Westpunt

Na entrada di plantashi Ascencion tambe tin un graf. Parse ku ta e vitó di e plantashi, Shon Martin ta derá akí. Ta bisá ku su último deseo tabata pa der’é bok’abou di moda ku lo e por a keda mira kon ta sigui ku e plantashi.
Hopi aña largu por a mira su graf na forma di silinder aki, pero na dékada ochenta buldozer a pasa kita e graf. Marina real ku ta manehando e lanthùis a disidí ku nan ta bai traha e graf di nobo. Komo no tabata konosí kon e graf tabata eksaktamente, nan a disidí na traha promé un graf rektangular. Pero despues ku a yama nan atenshon Marina a restourá e graf den su forma original. Na Dokterstuin, riba e tereno di famia Plantijn, tin dos graf di silinder, di kua un ta den bon estado ainda. Skondí den mondi na Westpunt tin un graf na forma di silinder na basta bon estado ainda. Por distinguí algun lèter riba e graf pero no ta kla ken ta derá akí.

Portrèt:
Graf di Matthias Schotborg

Fuentenan

• Pater Brenneker: Sambumbu no 5, Curaçao 1972
• Overlijdensakte no 15 1879, Centraal Historisch Archief
• Informashon oral di R. Schotborgh. Silvio Plantijn.

Teksto: Andre Rancuret, José da Camara. E outornan ta miembro di Grupo Herensha Arkeológiko NAAM. Portrèt: NAAM