Fleur de Marie un bista den pasado. Herensia arkeológiko di un bario lubidá.

E proyekto di Fleur de Marie ta ankrá den un relashon di kooperashon estrecho entre Secretariaat Stadsvernieuwing i Unidat di Bario Kòrsou, ku a start pa promové e desaroyo sosio-ekonómiko den sentro di siudat.

Fleur de Marie ta forma parti di Scharloo Abou i ta situá den Willemstad na Kòrsou. A.M. Chumaceiro Boulevard, Bargestraat i Fort Nassauweg ta deliniá e bario. Riba enkargo di Secretariaat Stadsvernieuwing, Fundashon NAAM a hasi investigashon arkeológiko den fèlt. E investigashon aki a wòrdu ehekutá dor di e arkeólogonan y boluntarionan di fundashon NAAM. E arkeólogonan a hasi nan investigashon pa yega na haña mas informashon di pasado di

Fleur de Marie i su habitantenan. For di prinsipio a usa Fleur de Marie komo lugá pa hende biba. Esaki ta nifiká ku pa un gran parti suela di e lugá ta perturbá. Tòg a haña informashon balioso durante e investigashon arkeológiko. E markanan ku a haña ta mustra ku Fleur de Marie ta un parti ku tabata kapital di isla Kòrsou, kaminda hopi hende a biba. Gran mayoria di e material ta prosedente di e periodo kolonial, aunke a topa tambe markanan di indjan.

E material parse ta indiká ku e habitantenan ta originario prinsipalmente di klase medio – e klasenan mas abou. Probablemente aki tabata biba diferente obrero i posiblemente tambe algun katibu i eks-katibu. A haña hopi material di eksterior, esaki ta nifiká ku posiblemente tabatin tambe un konsentrashon di strañero, kendenan a bin purba nan suerte i a establesé na nos isla. No tin masha informashon konosí tokante e área den e periodo akí, i esei ta hasi ku Fleur de Marie ta hunga un ròl sumamente interesante i importante den investigashon arkeológiko na Kòrsou.

Un publikashon pa públiko general y e rapòrt di e ekskavashon arkeológiko lo ta disponibel pronto!