Fontein, di plantashi, kampo di bataya, te proyekto pa desaroyo

Seri di Herensia Kultural

Fontein ta situá riba un sabana i un seru (Ser’i Neger/Ser’i Klof) na sur di e kaminda ku ta bai Westpunt, na altura di San Pedro. E grupo di trabou di Arkeologia di NAAM a realisá un investigashon na eskala chikitu den e kunuku na sur di Ser’i Neger, konosí komo fase 1. E investigashon a tuma sinku dia di trabou. Motibu ku a hasi e investigashon ta desaroyo di un parti di Fontein pa hasié un bario residensial. Un kondishon ku gobièrnu di Kòrsou a pone den e kaso akí ta ku mester evaluá i respetá e tereno- i ophetonan di balor kultural arkeológiko. Riba su mes e tereno ta forma parti di un área históriko importante: ta trata di e plantashi yamá Fontein ku ta kampo di bataya militar entre e luchadónan pa libertat i e trupanan kolonial di 20 te 25 di ougùstùs di aña 1795. Te ainda nunka promé no a investigá Plantashi Fontein den sentido kultural históriko òf arkeológiko.

Pasado turbulento

Durante mayor parti di siglo 18 Plantashi Fontein tabata den man di famia Lubke. Na 1795 e lanthùis tabata yama ‘Huize Bellevue’. Na prinsipio di siglo 19 e doño nobo a kambia nòmber di e plantashi i a yam’é ‘Ravenslust’. Na siglo 19 e plantashi a kambia hopi biaha di doño. E doño mas konosí tabata Casper Lodewijk van Uytrecht.
Probablemente e plantashi no tabata produsí muchu. E tera plat no tabata di suela muchu fértil. Ademas e tereno akí ta masha seku. Na diferente okashon a bati e plantashi na findishi pasobra e doño no por a paga debe di hipotek. Na 1852 Arend Hendrik de Rochemont a kumpra e plantashi i el a keda biba ei te na su morto na 1895. Despues di esei pronto e lanthùis a bin kaba na ruina.
E suseso históriko mas importante ku a tuma lugá na Fontein, tabata e gran rebelion di katibu na 1795. Dia 17 di ougùstùs katibunan di plantashi Kenepa bou di direkshon di Tula a lanta i eksigí nan libertat. E luchadónan pa libertat, ku tabata armá a kana bai plantashi Portomarie. Di ei, dia 20 di ougùstùs nan a dèk, protehé nan mes riba seru di Fontein pa nan stambai e trupanan kolonial na kaminda. E luchadónan pa libertat a resistí sinku dia, pero dia 25 di ougùstùs 1795 un bataya kòrtiku pero fuerte a tuma lugá aya. Den e bataya akí un kantidat no konosí di katibu a muri. E sòldánan a kohe hopi katibu prezu.
Ei mes a ehekutá e katibunan ku tabatin arma asina a kohe nan prezu. Komo rèspèt na e luchadónan pa libertat a kambia nòmber di e seru den Ser’i Neger i den boka di pueblo un punta saliente di e seru a haña e nòmber ‘Punta Tula’.

Investigashon den kunuku

Durante e investigashon realisá den kunuku den e promé fase di e proyekto di desaroyo, a resultá ku ta trata akí di un tereno ku ántes tabata kaminda ta planta i bestia tabata kome yerba na Plantashi Fontein. Prueba ta por ehèmpel e dos komplehonan di dam ku a haña aki. E promé sistema di dam mester a kanalisá awa di e roi (ku ta kore di Roi Kalki bai sùit). E otro ta situá na parti sùit-ost di Seru Rondó kaminda tambe tin un roi. E sistema akí ta mas chikitu i ménos desaroyá ku esun promé menshoná. E promé baki di awa sementá ku a topa aki, probablemente tambe a forma parti di e regulashon di uso di awa.
Por lo pronto no ta muchu kla si e komplehonan di dam tabata ekstendé den direkshon sùit. Total a haña ocho dam di piedra aki i un dam grandi di tera. Durante preparashon pa konstruí riba e tereno akí algun di e damanan di piedra a keda parsialmente òf pa un gran parti destruí. Kon i kon leu e otro damnan ta kore no por a investigá durante e investigashon limitá, tambe pa motibu ku nan ta desaparesé den e mondi será. A haña 27 piesa lòs. Ta dividí e hayasgonan akí den e kategorianan di serámika, ko’i glas, material di konstrukshon, opheto di piedra i di heru. E kantidat di ko’i glas ta notabel. Ta trata prinsipalmente di glas skur prosedente di loke ta yama ‘kelderflessen’ (bòter di bodega), otro nòmber ta tambe casebottles. Esakinan ta bòter firkant di yanefer. Na siglo 18 a kuminsá usa e bòternan akí. E material di glas ku a topa na Fontein, ta prosedente di bòter di bodega di e di dos mitar di siglo 19, ku un kabes ku ta kaba den un tùit. Den mes kategoria ta pone e ophetonan di piedra, entre otro butishi di yanefer fabriká di serámika. Hopi di e serámika ta simplemente opheto di uso, importá. A topa dos piesa partikular aki. Nan no ta esmaltá ni pintá. Posiblemente ta trata di serámika trahá lokalmente.

Balor kultural históriko

E kompleho ku ántes tabata un plantashon ta konsistí di e seru kaminda ruina di e lanthùis ta i un mangasina enorme. Tin ademas un kantidat di fundeshi i sobrá di un pueblesito di katibu. Aki ta posibel pa studia kon hende a biba na e plantashi akí for di siglo 18. No historia di e lanthùis so, sino tambe historia di e pueblo i di e peonnan ku a biba pegá ku e lanthùis. Nos ta konsiderá e área akí di alto balor arkeológiko. Ta rekomendabel pa konservá e kompleho akí di plantashon di forma ku no ta mishi kuné.
Riba i serka di e seru kaminda katibunan luchadó a lucha pa nan libertat bou di direkshon di Tula i a resistí e trupanan kolonial durante sinku dia, lo por topa marka di bataya den forma di bala i otro piesa mas di e lucha.
Debí na e susesonan históriko akí, manera ta tresé dilanti den e plan di desaroyo insular (Eilandontwikkelingsplan) (EOP 1994), e área akí tin alto balor históriko kultural. Rekonstrukshon di e bataya lo por trese mayor detaye di e susesonan históriko akí. E sabana pariba di e seru kaminda e lanthùis ta situá i na sùit di Ser’i Neger, ántes a sirbi di tereno pa planta i pa laga bestia kome yerba. Di echo ta difísil kalkulá balor di e tereno. E desaroyadó di proyekto a laga katapila pasa raspa e tereno for di yüni di 2006, promé ku a yega na fiha e balor arkeológiko. A limpia kita mas o ménos e promé 20 cm di suela. Ku e akto akí restonan arkeológiko ku eventualmente tabata ei a bai pèrdí. E sabana a hunga un ròl tambe durante e bataya na Ser’i Neger. Na promé lugá pasobra e trupanan kolonial a monta nan kañonnan aki pa por a tira riba e ‘rebeldenan’. Na di dos lugá historia oral ta konta ku e luchadónan pa libertat ku durante e bataya di ougùstùs 1795 a ser ehekutá o a pèrdè nan bida ta derá aki.

Fuente

Fontein. Een inventariserend veldonderzoek (Fase I). December 2006 – januari 2007. NAAM (2007). A. Rancuret